Agüd social tenor ledscha

Princip:

La constituziun svizra garantischa a tuot las persunas / famiglias in Svizra agüd finanzial e cussagliaziun in situaziuns precaras. Cumpetent per la concessiun da quist agüd es il cumün da domicil.

La dimensiun dal sustegn finanzial (agüd social) as drizza tenor las directivas dal chantun Argovia.

Per calcular il dret individual d’agüd social vain fat ün büdschet e calculà il minimum d’existenza tenor dret d’agüd social.

Parts dal minimum d’existenza tenor dret d’agüd social sun:

  • Cuosts da viver (pauschal tenor la quantità da persunas illa listessa economia)
  • Cuosts d‘abitar
  • Provedimaint da basa medicinic (premias da la sgüranza d‘amalats)
  • Prestaziuns individualas tenor la situaziun
    (spaisas d’acquists, cuosts per la chüra d’uffants dadour la famiglia).

Pro la calculaziun dal minimum d’existenza tenor dret d’agüd social nu vegnan resguardats impostas, debits, ratas da credit o d’impraist o sequestraziun da la paja tras l’uffizi da scussiun.

Chi chi nu ragiundscha il minimum d’existenza tenor il dret d’agüd social cun seis agens mezs (guadogn per lavur, prestaziuns da sgüranzas, rentas, contribuziuns d’alimaints eui.) ha il dret d’agüd social.

Co esa da proceder in cas d’üna situaziun precara e cur chi’s douvra ün agüd finanzial?

Ch’Ella/El s’annunzcha persunalmaing pro l’uffizi da servezzan social. Là survain Ella/El  las infuormaziuns davart las formalitats necessarias. Ella/El po però eir tour sü contact direct cul servezzan social regiunal Engiadina Bassa-Val Müstair, 7550 Scuol, e fixar ün prüm termin per discuter Sia situaziun finanziala e persunala.

Servezzan social regiunal Engiadina Bassa – Val Müstair
Cussagliaziun sociala, agüd social, cussagliaziun per dumondas da drogas
Chasa du Parc
7550 Scuol

Telefon: 081 864 12 68
Fax: 081 861 864 85 65
www.soa.gr.ch

Ingio as chatta ulteriuras infuormaziuns?

Il „Beobachter“ ha ramassà ils drets ed obligs, exaimpels da calculaziun sco eir infuormaziuns importantas ed adressas in sia broschüra "Habe ich Anspruch auf Sozialhilfe?" Quista broschüra po gnir retratta pro‘l Beobachter.

Ulteriuras infuormaziuns davart disposiziuns da l’agüd social e dumondas da dret as chatta eir sün la pagina d’internet da la Conferenza svizra da las instituziuns d’assistenza sociala suot www.skos.ch.

pro la secziun Uffizi social