Suot la direcziun da Cla Grand sco prüm dirigent e fondatur da nossa società han ses homens da Tschlin gnü il bun spiert ed il curaschi da provar da fuormar da l’on 1873 üna società da musica. In stüva d’ün o l’oter musicant gnivan salvats ils exercizis. La prüma gazetta rumantscha, “Il Progress”, edida e stampada a Strada in chasa S-charplatz, scriva a Büman da l’on 1874 d’üna preschentscha da la musica da Tschlin a Martina, ingio cha dafatta auditurs da Scuol e nan da Danuder as veivan chatats aint per tadlar quaista sco rarità in noss contuorns. Davo pacs ons da prosperità stuvet Cla Grand as retrar da la musica, el d’eira dvantà orb. Da l’on 1893 ais lura reuschi al magister Gian Gianet Cloetta da reanimar la società. Fin il 1904 ha Cloetta manà la musica e davent da l’on 1908 il magister Men Janett. Ils cumanzamaints d’eiran greivs e dumandaivan blera pazienzcha davart dal dirigent pero eir dals musicants. Bainschi nu d’eira l’armonia il prüm güsta perfetta. Davo üna producziun publica solaiva Men Janett dumandar a sia duonna, üna nativa glarunaisa, co chi saja statta la musica. Quella respondet “Jo scho recht, nu falsch tönt’s.” La via per la musica muosset pero insü. Dal 1927 gnit inaugurada la prüma bandera da la società in occasiun da la festa da musica a Tschlin. Nouv ons plü tard acquista la società la prüma unifuorma e piglia part cun quella dal 1948 a la prüma e l’unica festa federala, nempe a San Galla. Dal 1951 ais gnüda acquistada ün’otra unifuorma e raduond ot ons plü tard pudettan portar ils musicants per la prüma jada unifuormas davo masüra. In schner 1963 ha la musica da tour cumgià da seis dirigent Men Janett, chi avaiva manà la musica dürant 55 ons. Quai es sgüra üna rarità cur ch’üna società po prosperar dürant tschinch decennis e mez suot la medema direcziun. Seis figl Cla Janett ha lura surtut la bachetta fin dal 1986. Per bundant dudesch ons ha diret seis neiv Duri Janett la musica da Tschlin, la quala suna eir actualmaing darcheu suot la bachetta da Duri Janett e’l vicedirigent Curdin Caviezel. L’unifuorma actuala es gnüda inaugurada dal 1988 e serva daspö quai a raduond 25 musicantas e musicants sco imbellimaint a concerts e festas. In sia istorgia da 140 ons ha la musica da Tschlin tut part practicamaing a tuottas festas districtualas e chantunalas.