Permiss d’imprender ad ir cun auto
Dumonda per ün permiss d’imprender ad ir cun auto resp. ün permiss d’ir cun auto
Ella/El po retrar ils formulars da dumonda pro la controlla d’abitants o pro l’uffizi pel trafic sün via o tils implir oura qua sco datoteca pdf (per plaschair be dovrar palperi alb per stampar oura).
Avant co inoltrar la dumonda ha Ella/El da far examinar Sia vezzüda pro ün optiker (o meidi) autorisà. Il resultat vain scrit aint directamaing sül formular da dumonda. Quist test nu sto gnir manà sch’Ella/El posseda fingià ün permiss d’ir cun auto d’ün’otra categoria e scha l’examen respectiv nun es gnü fat avant plü co 2 ons.
Ils allegats necessaris sun manzunats sül formular da dumonda.
Barattar il permiss d’ir cun auto blau
Sch’Ella/El voul barattar Seis permiss d’ir cun auto blau da fin uossa in ün permiss in fuorma da carta da credit (la taxa chi’d es da pajar chatta Ella/El qua), po Ella/El retrar il formular da dumonda necessari pro las controllas d’abitants (administraziuns cumünalas e pro l’uffizi pel trafic sün via o til telechargiar qua sco datoteca pdf e til implir oura vi dal computer (per plaschair dovrar be palperi alb per stampar oura).
Il formular es da suottascriver in culur naira, da munir al lö previs cun üna fotografia da passaport in culur e da’ns trametter insembel cul permiss d’ir cun auto blau (in cas chi’s müda il nom e/u il lö da vaschinadi p. pl. agiundscher eir üna copcha da la carta d‘identità). In cas cha l’elavuraziun infra temp ütil nu vess dad esser pussibla turnantain nus il permiss d’ir cun auto blau cun üna data da scadenza. Al mumaint cha’l permiss in fuorma da carta da credit es gnü consegnà perdan tuot ils permiss d’ir cun auto da fin uossa lur valur.