Sandà & medicina
Center da sandà Engiadina Bassa
In Engiadina Bassa s'unischan importants offerents regiunals illas domenas provedimaint da la sandà, chüra, assistenza da persunas attempadas e wellness suot il tet dal «Center da sandà Engiadina Bassa». Uschè as poja coordinar idealmaing las sportas da l'ospidal regiunal, da la spitex, da las gruppas da chüra e dal Bogn Engiadina Scuol – pel bainstar da la populaziun indigena, da las paziaintas e dals paziaints, dals cliaints e dals giasts.
L'ospidal a Scuol spordscha üna medicina d'ota qualità cun infrastructura moderna – ün ospidal acut cullas domenas chirurgia / ortopedia, medicina interna / cardiologia, agüd per pagliolaintas / ginecologia, anestesiologia / terapia cunter doluors e medicina da salvamaint. Sco novità svizra as cumplettescha la medicina classica cun üna sporta da medicina cumplementera e da medicina palliativa: üna filosofia da chüra e da trattamaint universala chi considerescha l'uman in total. Ella vain perquai eir nomnada «medicina cumplessiva». Incumbenzas importantas illa chüra regiunala da persunas attempadas accumplischan la chasa da fliamaint e las gruppas da fliamaint chi sun affiliadas a l'ospidal.
Grazcha a l'aua richa da minerals dispuona il Bogn Engiadina Scuol d'üna vasta sporta da bogns, wellness e terapia, tanter oter generus bogns e saunas cul prüm bogn roman-iric da la Svizra. Ils servezzans da la spitex spordschan üna chüra ed ün fliamaint ambulant cumplet e contribuischan decisivamaing al mantegnimaint da l'ota qualità da vita da lur cliaints.
Üna via cumünaivla – ün model d'organisaziun innovativ e favuraivel pels ütilisaders chi rapreschainta üna vaira oasa da sandà e da wellness illas Alps e quai in maniera bain integrada illa cuntrada cultivada unica da la regiun dal parc naziunal.
